Булунская межпоселенческая централизованная библиотечная система
678400, Республика Саха (Якутия), Булунский улус, п.Тикси, ул.Морская, д.32
Наш адрес
Наш адрес
89247673557
Контактный номер
Контактный номер
Биһиги улууспутугар бэрт элбэх хомоҕой тыллаах, хоһоонньут, сэһэнньит, ырыаһыт дьон олороллор
14.12.2020
Биһиги улууспутугар бэрт элбэх хомоҕой тыллаах, хоһоонньут, сэһэнньит, ырыаһыт дьон олороллор. Сурукка киирбитинэн, сурахха иһиллэринэн 60-тан тахса айымньылаах, суруйар дьоҕурдаахтар бааллара биллэр. Улууспут алта нэһилиэгэр олорооччулар бэйэлэрин суруйар дьоннорунан, мелодистарынан киэн тутталлар. Биһиги дьоммут суруйуулара, ырыалара Республика таһымыгар эрэ буолбакка, омук сирдэринэн эмиэ тарҕаннылар. Онон күндү ааҕааччыларбыт, хайдах түгэн көстөрүнэн, ханна да сырыттарбыт, бэйэбит айар куттаах дьоммут суруйууларын, хоһооннорун, ырыаларын бар дьоммутугар тарҕатан, билиһиннэрэн сырдата сылдьарбыт наадалаах. Түгэнинэн туһанан, бу выставкаҕа киирбит ыстатыйалар ааптардарын кытта билиһиннэриэхпин баҕарабын:
1.Улууспут туһунан кылгас эрээри дьоһун
информацияны "Человек в Арктике" улуустааҕы сурунаал 1-кы номерыгар ааҕыаххытын син.
2.Биһиги биир дойдулаахпыт Т.К.Слепцова "Туризм в Арктике на примере Булунского района" диэн ыстатыйатыгар, бэйэтэ айаннаан, сылдьыбыт, үөрэппит, көрбүт, дьикти кэрэ айылҕалаах Таймылыыыр, Өлөөн сирдэрин тустарынан сиһилии билиһиннэрэр.
3.Сергей Владимирович уонна кини көмөлөһөөччүтэ-кэргэнэ Ольга Николаевна Поповтар "Морские имена Якутии" диэн сыралаах үлэлэрин түмүгэ. С.Н.Попов оччолорго 3 кинигэ автора, тыһыынчанан ыстатыйатын Советскай Арктиканы арыйыы историятын сырдатыыга анаабыта.
4."Ликбезтэн - Үтүөлээх учуутал" - автор РФ Үтүөлээх геолога Руслан Иванович Протопопов. Кинигэни аҕатын Иван Иннокентьевич Протопопов төрөөбүтэ 100 сааһыгар анаабыт. И.И.Протопопов сэрии ыар сылларыгар 1943-46 сс Булуҥ улууһугар Быковка спецпереселенецтар оҕолорун үөрэтэр оскуолаҕа директорынан, онтон эмиэ Быков саха уонна нуучча оскуолаларыгар учууталлаабыт, ол кэнниттэн Булуҥ райсоветыгар секретардаабыт учуутал киһи олоҕун-үлэтин туһунан.
5.Куприн И.И. "Мечтать полезно". Дьоҥҥо биллибэккэ-көстүбэккэ, оргууй аҕай, бэйэлэрэ-бэйэлэригэр сылдьан, олорон, эмиэ оннук биллибэтинэн олохтон баран хаалар дьон син бааллара буолуо биһиэхэ даҕаны...бэрт аҕыйах сыллааҕыта Тиксиигэ, оҕотуттан улаханыгар тиийэ дьону сөхтөрө-үөрдэ эмискэ Ак. Федорова диэкиттэн холууптар көтөн кэлээччилэр... Куприн таптаан, бүөбэйдээн ииппит холууптарын, бөһүөлэккэ инфекцияны, ыарыыны таһаллар диэн бэйэтигэр суох оҥорторбуттарын кэннэ кини эмиэ уһаабатаҕа...бу киһи, сураҕа, Тикси тэриллиэҕиттэн манна олорон үлэлээбит эбит, библиотека активнай ааҕааччыта этэ. М.Е.Салтыков-Щедрин сүгүрүйээччитэбин диэн, кини туһунан бэрт элбэҕи билэрэ, кэпсиэҕин да сөптөөҕө. Бу соҕотох, чараас кинигэтин аҕыйах тирээһинэн бэйэтин харчытынан уйунан маннааҕы хаһыат редакциятыгар таһаартарбыт, кинигэ автор архивыттан хомуллубут рукопистарга олоҕуран суруллубут.
6.Попов Е.Е. "Күндүтүк саныыбын Күһүүрбүн". Кинигэҕэ автор хоту дойду хоһууннарын, туундара чулууларын: табаһыттар, балыксыттар, булчуттар, улууһун историятын, дьонун-сэргэтин, көс кыра омуктар олохторун-дьаһахтарын, Булуҥҥа үлэлээн, элбэх сыраларын биэрбит дьон тустарынан нууччалыы, сахалыы тылынан олус ылыннарыылаахтык, сиһилии суруйбут.
7.Гукова Н.В. Аан дойдуга хатыламмат, биһиги эрэ улууспутугар баар дьикти сирдэри, Арктика дьиикэй эрээри, тыйыс кэрэ айылҕатын бэйэтин көрүүтүнэн уруһууйдаабыт хартыыналарын кытта билиһиннэрэр.
8. Олохтоох хоһоонньуттар Чирва Е.Г."Мелькают города", Дмитриева А.Е."Кыталыктар", Филиппова М.А.-Булунская "Өлүөнэ эҥсиллэр үөрүүнэн" уонна "Хоту дойдум хомоҕой хоһоонноро" - Булуҥ улууһун айар куттаах дьоннорун хомуурунньуктарын ааҕааччы барытыгар туһаныан сөп: сценарий, реферат суруйуутугар, кылгас иһитиннэрии оҥорорго, бырааһынньыктарга, бэрээһиннэргэ туһанарга олус наадалаах кинигэлэр.
9.Николаева П.М. "Каждую строку благословляю..." улуустааҕы "Арктика майааҕа" хаһыат юбилейнай таһаарыыта, манна аан бастакы отутус сыллардаахха тахсыбыт хаһыаттан саҕалаан, хаһыат таһаарыытын түбүктээх үлэтигэр ким, хаһан, хайдах үлэлээбитин туһунан билсиэххитин син.